Vulgata Clementina online

Liber Psalmorum, 90

¹ Laus cantici David. Qui habitat in adjutorio Altissimi, in protectione Dei cæli commorabitur.

² Dicet Domino: Susceptor meus es tu, et refugium meum ; Deus meus, sperabo in eum.

³ Quoniam ipse liberavit me de laqueo venantium, et a verbo aspero.

⁴ Scapulis suis obumbrabit tibi, et sub pennis ejus sperabis.

⁵ Scuto circumdabit te veritas ejus: non timebis a timore nocturno ;

⁶ a sagitta volante in die, a negotio perambulante in tenebris, ab incursu, et dæmonio meridiano.

⁷ Cadent a latere tuo mille, et decem millia a dextris tuis ; ad te autem non appropinquabit.

⁸ Verumtamen oculis tuis considerabis, et retributionem peccatorum videbis.

⁹ Quoniam tu es, Domine, spes mea ; Altissimum posuisti refugium tuum.

¹⁰ Non accedet ad te malum, et flagellum non appropinquabit tabernaculo tuo.

¹¹ Quoniam angelis suis mandavit de te, ut custodiant te in omnibus viis tuis.

¹² In manibus portabunt te, ne forte offendas ad lapidem pedem tuum.

¹³ Super aspidem et basiliscum ambulabis, et conculcabis leonem et draconem.

¹⁴ Quoniam in me speravit, liberabo eum ; protegam eum, quoniam cognovit nomen meum.

¹⁵ Clamabit ad me, et ego exaudiam eum ; cum ipso sum in tribulatione: eripiam eum, et glorificabo eum.

¹⁶ Longitudine dierum replebo eum, et ostendam illi salutare meum.

Notas:

Edição da bíblia em vulgata clementina produzida a partir de papiros, manuscritos e códices gregos antiquíssimos. Recomenda-se ler a tradução em português da vulgata pelo padre Matos Soares.

Produtos recomendados:

Compartilhe este capítulo da bíblia: