Vulgata Clementina online

Liber Psalmorum, 33

¹ Davidi, cum immutavit vultum suum coram Achimelech, et dimisit eum, et abiit.

² Benedicam Dominum in omni tempore ; semper laus ejus in ore meo.

³ In Domino laudabitur anima mea: audiant mansueti, et lætentur.

⁴ Magnificate Dominum mecum, et exaltemus nomen ejus in idipsum.

⁵ Exquisivi Dominum, et exaudivit me ; et ex omnibus tribulationibus meis eripuit me.

⁶ Accedite ad eum, et illuminamini ; et facies vestræ non confundentur.

⁷ Iste pauper clamavit, et Dominus exaudivit eum, et de omnibus tribulationibus ejus salvavit eum.

⁸ Immittet angelus Domini in circuitu timentium eum, et eripiet eos.

⁹ Gustate et videte quoniam suavis est Dominus ; beatus vir qui sperat in eo.

¹⁰ Timete Dominum, omnes sancti ejus, quoniam non est inopia timentibus eum.

¹¹ Divites eguerunt, et esurierunt ; inquirentes autem Dominum non minuentur omni bono.

¹² Venite, filii ; audite me: timorem Domini docebo vos.

¹³ Quis est homo qui vult vitam ; diligit dies videre bonos?

¹⁴ Prohibe linguam tuam a malo, et labia tua ne loquantur dolum.

¹⁵ Diverte a malo, et fac bonum ; inquire pacem, et persequere eam.

¹⁶ Oculi Domini super justos, et aures ejus in preces eorum.

¹⁷ Vultus autem Domini super facientes mala, ut perdat de terra memoriam eorum.

¹⁸ Clamaverunt justi, et Dominus exaudivit eos ; et ex omnibus tribulationibus eorum liberavit eos.

¹⁹ Juxta est Dominus iis qui tribulato sunt corde, et humiles spiritu salvabit.

²⁰ Multæ tribulationes justorum ; et de omnibus his liberabit eos Dominus.

²¹ Custodit Dominus omnia ossa eorum: unum ex his non conteretur.

²² Mors peccatorum pessima ; et qui oderunt justum delinquent.

²³ Redimet Dominus animas servorum suorum, et non delinquent omnes qui sperant in eo.

Notas:

Edição da bíblia em vulgata clementina produzida a partir de papiros, manuscritos e códices gregos antiquíssimos. Recomenda-se ler a tradução em português da vulgata pelo padre Matos Soares.

Produtos recomendados:

Compartilhe este capítulo da bíblia: