Vulgata Clementina online

Liber Psalmorum, 32

¹ Psalmus David. Exsultate, justi, in Domino ; rectos decet collaudatio.

² Confitemini Domino in cithara ; in psalterio decem chordarum psallite illi.

³ Cantate ei canticum novum ; bene psallite ei in vociferatione.

⁴ Quia rectum est verbum Domini, et omnia opera ejus in fide.

⁵ Diligit misericordiam et judicium ; misericordia Domini plena est terra.

⁶ Verbo Domini cæli firmati sunt, et spiritu oris ejus omnis virtus eorum.

⁷ Congregans sicut in utre aquas maris ; ponens in thesauris abyssos.

⁸ Timeat Dominum omnis terra ; ab eo autem commoveantur omnes inhabitantes orbem.

⁹ Quoniam ipse dixit, et facta sunt ; ipse mandavit et creata sunt.

¹⁰ Dominus dissipat consilia gentium ; reprobat autem cogitationes populorum, et reprobat consilia principum.

¹¹ Consilium autem Domini in æternum manet ; cogitationes cordis ejus in generatione et generationem.

¹² Beata gens cujus est Dominus Deus ejus ; populus quem elegit in hæreditatem sibi.

¹³ De cælo respexit Dominus ; vidit omnes filios hominum.

¹⁴ De præparato habitaculo suo respexit super omnes qui habitant terram:

¹⁵ qui finxit sigillatim corda eorum ; qui intelligit omnia opera eorum.

¹⁶ Non salvatur rex per multam virtutem, et gigas non salvabitur in multitudine virtutis suæ.

¹⁷ Fallax equus ad salutem ; in abundantia autem virtutis suæ non salvabitur.

¹⁸ Ecce oculi Domini super metuentes eum, et in eis qui sperant super misericordia ejus:

¹⁹ ut eruat a morte animas eorum, et alat eos in fame.

²⁰ Anima nostra sustinet Dominum, quoniam adjutor et protector noster est.

²¹ Quia in eo lætabitur cor nostrum, et in nomine sancto ejus speravimus.

²² Fiat misericordia tua, Domine, super nos, quemadmodum speravimus in te.

Notas:

Edição da bíblia em vulgata clementina produzida a partir de papiros, manuscritos e códices gregos antiquíssimos. Recomenda-se ler a tradução em português da vulgata pelo padre Matos Soares.

Produtos recomendados:

Compartilhe este capítulo da bíblia: