Vulgata Clementina online

Liber Iob, 21

¹ Respondens autem Job, dixit:

² Audite, quæso, sermones meos, et agite pœnitentiam.

³ Sustinete me, et ego loquar: et post mea, si videbitur, verba, ridete.

⁴ Numquid contra hominem disputatio mea est, ut merito non debeam contristari?

⁵ Attendite me et obstupescite, et superponite digitum ori vestro.

⁶ Et ego, quando recordatus fuero, pertimesco, et concutit carnem meam tremor.

⁷ Quare ergo impii vivunt, sublevati sunt, confortatique divitiis?

⁸ Semen eorum permanet coram eis: propinquorum turba et nepotum in conspectu eorum.

⁹ Domus eorum securæ sunt et pacatæ, et non est virga Dei super illos.

¹⁰ Bos eorum concepit, et non abortivit: vacca peperit, et non est privata fœtu suo.

¹¹ Egrediuntur quasi greges parvuli eorum, et infantes eorum exsultant lusibus.

¹² Tenent tympanum et citharam, et gaudent ad sonitum organi.

¹³ Ducunt in bonis dies suos, et in puncto ad inferna descendunt.

¹⁴ Qui dixerunt Deo: Recede a nobis, et scientiam viarum tuarum nolumus.

¹⁵ Quis est Omnipotens, ut serviamus ei? et quid nobis prodest si oraverimus illum?

¹⁶ Verumtamen quia non sunt in manu eorum bona sua, consilium impiorum longe sit a me.

¹⁷ Quoties lucerna impiorum extinguetur, et superveniet eis inundatio, et dolores dividet furoris sui?

¹⁸ Erunt sicut paleæ ante faciem venti, et sicut favilla quam turbo dispergit.

¹⁹ Deus servabit filiis illius dolorem patris, et cum reddiderit, tunc sciet.

²⁰ Videbunt oculi ejus interfectionem suam, et de furore Omnipotentis bibet.

²¹ Quid enim ad eum pertinet de domo sua post se, et si numerus mensium ejus dimidietur?

²² Numquid Deus docebit quispiam scientiam, qui excelsos judicat?

²³ Iste moritur robustus et sanus, dives et felix:

²⁴ viscera ejus plena sunt adipe, et medullis ossa illius irrigantur:

²⁵ alius vero moritur in amaritudine animæ absque ullis opibus:

²⁶ et tamen simul in pulvere dormient, et vermes operient eos.

²⁷ Certe novi cogitationes vestras, et sententias contra me iniquas.

²⁸ Dicitis enim: Ubi est domus principis? et ubi tabernacula impiorum?

²⁹ Interrogate quemlibet de viatoribus, et hæc eadem illum intelligere cognoscetis:

³⁰ quia in diem perditionis servatur malus, et ad diem furoris ducetur.

³¹ Quis arguet coram eo viam ejus? et quæ fecit, quis reddet illi?

³² Ipse ad sepulchra ducetur, et in congerie mortuorum vigilabit.

³³ Dulcis fuit glareis Cocyti, et post se omnem hominem trahet, et ante se innumerabiles.

³⁴ Quomodo igitur consolamini me frustra, cum responsio vestra repugnare ostensa sit veritati?

Notas:

Edição da bíblia em vulgata clementina produzida a partir de papiros, manuscritos e códices gregos antiquíssimos. Recomenda-se ler a tradução em português da vulgata pelo padre Matos Soares.

Produtos recomendados:

Compartilhe este capítulo da bíblia: