Vulgata Clementina online

Liber Iob, 18

¹ Respondens autem Baldad Suhites, dixit:

² Usque ad quem finem verba jactabitis? intelligite prius, et sic loquamur.

³ Quare reputati sumus ut jumenta, et sorduimus coram vobis?

⁴ Qui perdis animam tuam in furore tuo, numquid propter te derelinquetur terra, et transferentur rupes de loco suo?

⁵ Nonne lux impii extinguetur, nec splendebit flamma ignis ejus?

⁶ Lux obtenebrescet in tabernaculo illius, et lucerna quæ super eum est extinguetur.

⁷ Arctabuntur gressus virtutis ejus, et præcipitabit eum consilium suum.

⁸ Immisit enim in rete pedes suos, et in maculis ejus ambulat.

⁹ Tenebitur planta illius laqueo, et exardescet contra eum sitis.

¹⁰ Abscondita est in terra pedica ejus, et decipula illius super semitam.

¹¹ Undique terrebunt eum formidines, et involvent pedes ejus.

¹² Attenuetur fame robur ejus, et inedia invadat costas illius.

¹³ Devoret pulchritudinem cutis ejus ; consumat brachia illius primogenita mors.

¹⁴ Avellatur de tabernaculo suo fiducia ejus, et calcet super eum, quasi rex, interitus.

¹⁵ Habitent in tabernaculo illius socii ejus qui non est ; aspergatur in tabernaculo ejus sulphur.

¹⁶ Deorsum radices ejus siccentur: sursum autem atteratur messis ejus.

¹⁷ Memoria illius pereat de terra, et non celebretur nomen ejus in plateis.

¹⁸ Expellet eum de luce in tenebras, et de orbe transferet eum.

¹⁹ Non erit semen ejus, neque progenies in populo suo, nec ullæ reliquiæ in regionibus ejus.

²⁰ In die ejus stupebunt novissimi, et primos invadet horror.

²¹ Hæc sunt ergo tabernacula iniqui, et iste locus ejus qui ignorat Deum.

Notas:

Edição da bíblia em vulgata clementina produzida a partir de papiros, manuscritos e códices gregos antiquíssimos. Recomenda-se ler a tradução em português da vulgata pelo padre Matos Soares.

Produtos recomendados:

Compartilhe este capítulo da bíblia: