Biblia católica - Canticum Canticorum 7

Canticum Canticorum, 7

¹ Sponsa. Quid videbis in Sulamite, nisi choros castrorum? Chorus. Quam pulchri sunt gressus tui in calceamentis, filia principis ! Juncturæ femorum tuorum sicut monilia quæ fabricata sunt manu artificis.

² Umbilicus tuus crater tornatilis, numquam indigens poculis. Venter tuus sicut acervus tritici vallatus liliis.

³ Duo ubera tua sicut duo hinnuli, gemelli capreæ.

⁴ Collum tuum sicut turris eburnea ; oculi tui sicut piscinæ in Hesebon quæ sunt in porta filiæ multitudinis. Nasus tuus sicut turris Libani, quæ respicit contra Damascum.

⁵ Caput tuum ut Carmelus ; et comæ capitis tui sicut purpura regis vincta canalibus.

⁶ Sponsus. Quam pulchra es, et quam decora, carissima, in deliciis !

⁷ Statura tua assimilata est palmæ, et ubera tua botris.

⁸ Dixi: Ascendam in palmam, et apprehendam fructus ejus ; et erunt ubera tua sicut botri vineæ, et odor oris tui sicut malorum.

⁹ Guttur tuum sicut vinum optimum, dignum dilecto meo ad potandum, labiisque et dentibus illius ad ruminandum.

¹⁰ Sponsa. Ego dilecto meo, et ad me conversio ejus.

¹¹ Veni, dilecte mi, egrediamur in agrum, commoremur in villis.

¹² Mane surgamus ad vineas: videamus si floruit vinea, si flores fructus parturiunt, si floruerunt mala punica ; ibi dabo tibi ubera mea.

¹³ Mandragoræ dederunt odorem in portis nostris omnia poma: nova et vetera, dilecte mi, servavi tibi.

Notas:

Edição da bíblia em vulgata clementina produzida a partir de papiros, manuscritos e códices gregos antiquíssimos. Recomenda-se ler a tradução em português da vulgata pelo padre Matos Soares.

Produtos recomendados: