Vulgata Clementina online

Liber Sapientiae, 9

¹ Deus patrum meorum, et Domine misericordiæ, qui fecisti omnia verbo tuo,

² et sapientia tua constituisti hominem, ut dominaretur creaturæ quæ a te facta est,

³ ut disponat orbem terrarum in æquitate et justitia, et in directione cordis judicium judicet:

⁴ da mihi sedium tuarum assistricem sapientiam, et noli me reprobare a pueris tuis:

⁵ quoniam servus tuus sum ego, et filius ancillæ tuæ ; homo infirmus, et exigui temporis, et minor ad intellectum judicii et legum.

⁶ Nam etsi quis erit consummatus inter filios hominum, si ab illo abfuerit sapientia tua, in nihilum computabitur.

⁷ Tu elegisti me regem populo tuo, et judicem filiorum tuorum et filiarum:

⁸ et dixisti me ædificare templum in monte sancto tuo, et in civitate habitationis tuæ altare: similitudinem tabernaculi sancti tui quod præparasti ab initio.

⁹ Et tecum sapientia tua, quæ novit opera tua, quæ et affuit tunc cum orbem terrarum faceres, et sciebat quid esset placitum oculis tuis, et quid directum in præceptis tuis.

¹⁰ Mitte illam de cælis sanctis tuis, et a sede magnitudinis tuæ, ut mecum sit et mecum laboret, ut sciam quid acceptum sit apud te:

¹¹ scit enim illa omnia, et intelligit, et deducet me in operibus meis sobrie, et custodiet me in sua potentia.

¹² Et erunt accepta opera mea, et disponam populum tuum juste, et ero dignus sedium patris mei.

¹³ Quis enim hominum poterit scire consilium Dei? aut quis poterit cogitare quid velit Deus?

¹⁴ Cogitationes enim mortalium timidæ, et incertæ providentiæ nostræ ;

¹⁵ corpus enim quod corrumpitur aggravat animam, et terrena inhabitatio deprimit sensum multa cogitantem.

¹⁶ Et difficile æstimamus quæ in terra sunt, et quæ in prospectu sunt invenimus cum labore: quæ autem in cælis sunt, quis investigabit?

¹⁷ Sensum autem tuum, quis sciet, nisi tu dederis sapientiam, et miseris spiritum sanctum tuum de altissimis,

¹⁸ et sic correctæ sint semitæ eorum qui sunt in terris, et quæ tibi placent didicerint homines?

¹⁹ Nam per sapientiam sanati sunt quicumque placuerunt tibi, Domine, a principio.

Notas:

Edição da bíblia em vulgata clementina produzida a partir de papiros, manuscritos e códices gregos antiquíssimos. Recomenda-se ler a tradução em português da vulgata pelo padre Matos Soares.

Produtos recomendados:

Compartilhe este capítulo da bíblia: