Vulgata Clementina online

Liber Sapientiae, 4

¹ O quam pulchra est casta generatio, cum claritate ! immortalis est enim memoria illius, quoniam et apud Deum nota est, et apud homines.

² Cum præsens est, imitantur illam, et desiderant eam cum se eduxerit ; et in perpetuum coronata triumphat, incoinquinatorum certaminum præmium vincens.

³ Multigena autem impiorum multitudo non erit utilis, et spuria vitulamina non dabunt radices altas, nec stabile firmamentum collocabunt.

⁴ Etsi in ramis in tempore germinaverint, infirmiter posita, a vento commovebuntur, et a nimietate ventorum eradicabuntur.

⁵ Confringentur enim rami inconsummati ; et fructus illorum inutiles et acerbi ad manducandum, et ad nihilum apti.

⁶ Ex iniquis enim somnis filii qui nascuntur, testes sunt nequitiæ adversus parentes in interrogatione sua.

⁷ Justus autem si morte præoccupatus fuerit, in refrigerio erit ;

⁸ senectus enim venerabilis est non diuturna, neque annorum numero computata: cani autem sunt sensus hominis,

⁹ et ætas senectutis vita immaculata.

¹⁰ Placens Deo factus est dilectus, et vivens inter peccatores translatus est.

¹¹ Raptus est, ne malitia mutaret intellectum ejus, aut ne fictio deciperet animam illius.

¹² Fascinatio enim nugacitatis obscurat bona, et inconstantia concupiscentiæ transvertit sensum sine malitia.

¹³ Consummatus in brevi, explevit tempora multa ;

¹⁴ placita enim erat Deo anima illius: propter hoc properavit educere illum de medio iniquitatum. Populi autem videntes, et non intelligentes, nec ponentes in præcordiis talia,

¹⁵ quoniam gratia Dei et misericordia est in sanctos ejus, et respectus in electos illius.

¹⁶ Condemnat autem justus mortuus vivos impios, et juventus celerius consummata longam vitam injusti.

¹⁷ Videbunt enim finem sapientis, et non intelligent quid cogitaverit de illo Deus, et quare munierit illum Dominus.

¹⁸ Videbunt, et contemnent eum ; illos autem Dominus irridebit.

¹⁹ Et erunt post hæc decidentes sine honore, et in contumelia inter mortuos in perpetuum: quoniam disrumpet illos inflatos sine voce, et commovebit illos a fundamentis, et usque ad supremum desolabuntur, et erunt gementes, et memoria illorum peribit.

²⁰ Venient in cogitatione peccatorum suorum timidi, et traducent illos ex adverso iniquitates ipsorum.

Notas:

Edição da bíblia em vulgata clementina produzida a partir de papiros, manuscritos e códices gregos antiquíssimos. Recomenda-se ler a tradução em português da vulgata pelo padre Matos Soares.

Produtos recomendados:

Compartilhe este capítulo da bíblia: