Biblia católica - Liber Ecclesiasticus 4

Liber Ecclesiasticus, 4

¹ Fili, eleemosynam pauperis ne defraudes, et oculos tuos ne transvertas a paupere.

² Animam esurientem ne despexeris, et non exasperes pauperem in inopia sua.

³ Cor inopis ne afflixeris, et non protrahas datum angustianti.

⁴ Rogationem contribulati ne abjicias, et non avertas faciem tuam ab egeno.

⁵ Ab inope ne avertas oculos tuos propter iram: et non relinquas quærentibus tibi retro maledicere.

⁶ Maledicentis enim tibi in amaritudine animæ, exaudietur deprecatio illius: exaudiet autem eum qui fecit illum.

⁷ Congregationi pauperum affabilem te facito: et presbytero humilia animam tuam, et magnato humilia caput tuum.

⁸ Declina pauperi sine tristitia aurem tuam, et redde debitum tuum, et responde illi pacifica in mansuetudine.

⁹ Libera eum qui injuriam patitur de manu superbi, et non acide feras in anima tua.

¹⁰ In judicando esto pupillis misericors ut pater, et pro viro matri illorum:

¹¹ et eris tu velut filius Altissimi obediens, et miserebitur tui magis quam mater.

¹² Sapientia filiis suis vitam inspirat: et suscipit inquirentes se, et præibit in via justitiæ.

¹³ Et qui illam diligit, diligit vitam, et qui vigilaverint ad illam complectentur placorem ejus.

¹⁴ Qui tenuerint illam, vitam hæreditabunt: et quo introibit benedicet Deus.

¹⁵ Qui serviunt ei obsequentes erunt sancto: et eos qui diligunt illam, diligit Deus.

¹⁶ Qui audit illam judicabit gentes: et qui intuetur illam permanebit confidens.

¹⁷ Si crediderit ei, hæreditabit illam, et erunt in confirmatione creaturæ illius:

¹⁸ quoniam in tentatione ambulat cum eo, et in primis eligit eum.

¹⁹ Timorem, et metum, et probationem inducet super illum: et cruciabit illum in tribulatione doctrinæ suæ, donec tentet eum in cogitationibus suis, et credat animæ illius.

²⁰ Et firmabit illum, et iter adducet directum ad illum, et lætificabit illum:

²¹ et denudabit absconsa sua illi, et thesaurizabit super illum scientiam et intellectum justitiæ.

²² Si autem oberraverit, derelinquet eum, et tradet eum in manus inimici sui.

²³ Fili, conserva tempus, et devita a malo.

²⁴ Pro anima tua ne confundaris dicere verum:

²⁵ est enim confusio adducens peccatum, et est confusio adducens gloriam et gratiam.

²⁶ Ne accipias faciem adversus faciem tuam, nec adversus animam tuam mendacium.

²⁷ Ne reverearis proximum tuum in casu suo,

²⁸ nec retineas verbum in tempore salutis. Non abscondas sapientiam tuam in decore suo:

²⁹ in lingua enim sapientia dignoscitur: et sensus, et scientia, et doctrina in verbo sensati, et firmamentum in operibus justitiæ.

³⁰ Non contradicas verbo veritatis ullo modo, et de mendacio ineruditionis tuæ confundere.

³¹ Non confundaris confiteri peccata tua, et ne subjicias te omni homini pro peccato.

³² Noli resistere contra faciem potentis, nec coneris contra ictum fluvii.

³³ Pro justitia agonizare pro anima tua, et usque ad mortem certa pro justitia: et Deus expugnabit pro te inimicos tuos.

³⁴ Noli citatus esse in lingua tua, et inutilis, et remissus in operibus tuis.

³⁵ Noli esse sicut leo in domo tua, evertens domesticos tuos, et opprimens subjectos tibi.

³⁶ Non sit porrecta manus tua ad accipiendum, et ad dandum collecta.

Notas:

Edição da bíblia em vulgata clementina produzida a partir de papiros, manuscritos e códices gregos antiquíssimos. Recomenda-se ler a tradução em português da vulgata pelo padre Matos Soares.

Produtos recomendados: