Vulgata Clementina online

Liber Ecclesiasticus, 32

¹ Rectorem te posuerunt? noli extolli: esto in illis quasi unus ex ipsis.

² Curam illorum habe, et sic conside, et omni cura tua explicita recumbe:

³ ut læteris propter illos, et ornamentum gratiæ accipias coronam, et dignationem consequaris corrogationis.

⁴ Loquere major natu: decet enim te

⁵ primum verbum diligenti scientia, et non impedias musicam.

⁶ Ubi auditus non est, non effundas sermonem, et importune noli extolli in sapientia tua.

⁷ Gemmula carbunculi in ornamento auri, et comparatio musicorum in convivio vini.

⁸ Sicut in fabricatione auri signum est smaragdi, sic numerus musicorum in jucundo et moderato vino.

⁹ Audi tacens, et pro reverentia accedet tibi bona gratia.

¹⁰ Adolescens, loquere in tua causa vix.

¹¹ Si bis interrogatus fueris, habeat caput responsum tuum.

¹² In multis esto quasi inscius, et audi tacens simul et quærens.

¹³ In medio magnatorum non præsumas: et ubi sunt senes non multum loquaris.

¹⁴ Ante grandinem præibit coruscatio: et ante verecundiam præibit gratia, et pro reverentia accedet tibi bona gratia.

¹⁵ Et hora surgendi non te trices: præcurre autem prior in domum tuam, et illic avocare, et illic lude,

¹⁶ et age conceptiones tuas, et non in delictis et verbo superbo:

¹⁷ et super his omnibus benedicito Dominum, qui fecit te, et inebriantem te ab omnibus bonis suis.

¹⁸ Qui timet Dominum excipiet doctrinam ejus: et qui vigilaverint ad illum invenient benedictionem.

¹⁹ Qui quærit legem replebitur ab ea, et qui insidiose agit scandalizabitur in ea.

²⁰ Qui timent Dominum invenient judicium justum, et justitias quasi lumen accendent.

²¹ Peccator homo vitabit correptionem, et secundum voluntatem suam inveniet comparationem.

²² Vir consilii non disperdet intelligentiam: alienus et superbus non pertimescet timorem:

²³ etiam postquam fecit cum eo sine consilio, et suis insectationibus arguetur.

²⁴ Fili, sine consilio nihil facias, et post factum non pœnitebis.

²⁵ In via ruinæ non eas, et non offendes in lapides: nec credas te viæ laboriosæ, ne ponas animæ tuæ scandalum.

²⁶ Et a filiis tuis cave, et a domesticis tuis attende.

²⁷ In omni opere tuo crede ex fide animæ tuæ, hoc est enim conservatio mandatorum.

²⁸ Qui credit Deo attendit mandatis: et qui confidit in illo non minorabitur.

Notas:

Edição da bíblia em vulgata clementina produzida a partir de papiros, manuscritos e códices gregos antiquíssimos. Recomenda-se ler a tradução em português da vulgata pelo padre Matos Soares.

Produtos recomendados:

Compartilhe este capítulo da bíblia: