Vulgata Clementina online

Liber Ecclesiasticus, 29

¹ Qui facit misericordiam fœneratur proximo suo: et qui prævalet manu mandata servat.

² Fœnerare proximo tuo in tempore necessitatis illius: et iterum redde proximo in tempore suo.

³ Confirma verbum, et fideliter age cum illo: et in omni tempore invenies quod tibi necessarium est.

⁴ Multi quasi inventionem æstimaverunt fœnus, et præstiterunt molestiam his qui se adjuverunt.

⁵ Donec accipiant, osculantur manus dantis, et in promissionibus humiliant vocem suam:

⁶ et in tempore redditionis postulabit tempus, et loquetur verba tædii et murmurationum, et tempus causabitur.

⁷ Si autem potuerit reddere, adversabitur: solidi vix reddet dimidium, et computabit illud quasi inventionem:

⁸ sin autem, fraudabit illum pecunia sua, et possidebit illum inimicum gratis:

⁹ et convitia et maledicta reddet illi, et pro honore et beneficio reddet illi contumeliam.

¹⁰ Multi non causa nequitiæ non fœnerati sunt, sed fraudari gratis timuerunt.

¹¹ Verumtamen super humilem animo fortior esto, et pro eleemosyna non trahas illum.

¹² Propter mandatum assume pauperem, et propter inopiam ejus ne dimittas eum vacuum.

¹³ Perde pecuniam propter fratrem et amicum tuum, et non abscondas illam sub lapide in perditionem.

¹⁴ Pone thesaurum tuum in præceptis Altissimi, et proderit tibi magis quam aurum.

¹⁵ Conclude eleemosynam in corde pauperis, et hæc pro te exorabit ab omni malo.

¹⁶ Super scutum potentis

¹⁷ et super lanceam

¹⁸ adversus inimicum tuum pugnabit.

¹⁹ Vir bonus fidem facit pro proximo suo: et qui perdiderit confusionem derelinquet sibi.

²⁰ Gratiam fidejussoris ne obliviscaris: dedit enim pro te animam suam.

²¹ Repromissorem fugit peccator et immundus.

²² Bona repromissoris sibi ascribit peccator: et ingratus sensu derelinquet liberantem se.

²³ Vir repromittit de proximo suo: et cum perdiderit reverentiam, derelinquetur ab eo.

²⁴ Repromissio nequissima multos perdidit dirigentes, et commovit illos quasi fluctus maris.

²⁵ Viros potentes gyrans migrare fecit, et vagati sunt in gentibus alienis.

²⁶ Peccator transgrediens mandatum Domini incidet in promissionem nequam: et qui conatur multa agere incidet in judicium.

²⁷ Recupera proximum secundum virtutem tuam, et attende tibi ne incidas.

²⁸ Initium vitæ hominis, aqua et panis, et vestimentum, et domus protegens turpitudinem.

²⁹ Melior est victus pauperis sub tegmine asserum quam epulæ splendidæ in peregre sine domicilio.

³⁰ Minimum pro magno placeat tibi, et improperium peregrinationis non audies.

³¹ Vita nequam hospitandi de domo in domum: et ubi hospitabitur non fiducialiter aget, nec aperiet os.

³² Hospitabitur, et pascet, et potabit ingratos, et ad hæc amara audiet:

³³ transi, hospes, et orna mensam, et quæ in manu habes ciba ceteros.

³⁴ Exi a facie honoris amicorum meorum: necessitudine domus meæ hospitio mihi factus est frater.

³⁵ Gravia hæc homini habenti sensum: correptio domus, et improperium fœneratoris.

Notas:

Edição da bíblia em vulgata clementina produzida a partir de papiros, manuscritos e códices gregos antiquíssimos. Recomenda-se ler a tradução em português da vulgata pelo padre Matos Soares.

Produtos recomendados:

Compartilhe este capítulo da bíblia: